مشاكل نوكيا N78 نصيحة لوجه الله

السلام عليكم ورحمة الله وبركاته

اذا ما عندك وقت انزل تحت تلاقي ملخص المشاكل .. واللي عنده وقت ممكن يقرا التفاصيل ..
قبل فترة قررت اشتري جوال جديد وبعد المقارنات العديدة وقع الاختيار على نوكيا N78 فمواصفاته ممتازة بالنسبة لسعره ..
المشكلة لم اجد الا صنع صيني ولم اجد صناعة اخرى افضل فققرت شراءه رغم ذلك لأنه سيكون على الضمان ..
الجهاز حجمه رائع وخفيف الوزن ومواصفاته مثل الـ N95 و لكن الكاميرا 3.2 ميقا بكسل ..
وهناك ميزة اضافية لا توجد في الـ N95
في اول يوم اشتريته لاحظت مشكلة جابت لي الضغط وكرهت حياتي بسببها.. وذهبت للوكالة لاعادته لكنهم رفضوا ..
المشكلة هي في الازرار .. لو تلاحظون في الصورة توجد في الجهاز ستة ازرار مشتبكه في بعضها

المشكلة تحدث اذا اردت ان تضغط على احد هذه الازرار .. وتتفاجأ بأن الزر الذي بجانبه هو الذي انضغط !

تصير هذه المشكلة تقريبا بنسبة 30% من مرات الضغط على زر الرجوع ( في اعلى اليمين ) وتتفاجأ بأن الجهاز عاد الى وضع الاستعداد الى الشاشة الرئيسية .. يعني الزر اللي انضغط هو الزر الاحمر ( زر اقفال المكالمات ) وليس زر العودة ..
تخيل هذا يصير مرات بعدما اتصل في واحد و اريد تشغيل السماعة الخارجية (الاسبيكر) وفجأة تغلق المكالمة !
او تكون مشغل برنامج او تتصفح النت او برنامج الخرائط وبعد بحث وتعب .. يروح تعبك في الفاضي بسبب هذا الزر !
لما رحت الوكالة رفض انه يبدله او يسوي فيه اي شي .. قال لي .. لازم تضغطه بالراحة لان ازرار الاجهزة اللي زي كذا حساسة !!
قلت الله يعين .. اصبر على هذي المشكلة وان شاء الله اتعود على الضغط بالرااااااحة .. لكن مافي فايدة .. المشكلة تحدث دائما..
وبعد كم يوم اكتشفت مشكلة ثانية ماكنت ادري عنها .. المشكلة كنت مسافر وقتها ولا عندي اوراق الضمان حتى اخذ الجوال للصيانة ..
كنت مرات - يمكن 40% من المكالمات - لما اتصل على احد وتبدأ المكالمة .. فجأة تنفصل المكالمة .. وليته وقف عند كذا .. لما تفصل المكالمة تصير على تعليق ( هولد )
يعني المكالمة تنحسب عليك ولا تقدر تقفلها او اي شيء !! يعني لوما انتبه الشخص الثاني ان المكالمة في وضع التعليق .. الله يعينك على الفاتورة .. وهذا بالفعل ما حصل لي..
عندما صارت المكالمة في وضع التعليق .. و حاولت اتصل على الشخص مرة ثانية ولكن كان جواله مشغول !! لانه مو حاط خدمة الانتظار .. وانشغل هو ونسي المكالمة .. !! والحسابة بتحسب ..
مشكلة اخرى تحدث في كل مرة (100%) وهي انه اول ما يوصل اي مسج .. الجهاز يسوي ريستارت لوحده !!
وتخيل الوضع كلما وصلك مسج تنتظر حضرت الجهاز يسوي ريستارت عشان تعرف تستخدمه مرة ثانية !

مشكلة ثانية في مرسل الاف ام ( FM transmitter) وهو لما تحاول تشغل الصوت على الراديو - كما هو مفترض - لا تعمل هذه الخاصية الا بعد اعادة تشغيل الجهاز !
تصير هذه المشكلة تقريبا بنسبة 20% من عدد مرات تشغيل مرسل الاف ام ..
مشكلة اخرى تحدث في وضع الاستعداد عند اختيار الوضع الرأسي .. وهو انه الارقام ما تشتغل لما تضغط عليها .. ولازم تضغط الزر الاحمر حتى تشتغل !
حاولت اسوي فرمته للجهاز .. بالطريقة المعروفة .. (اعادة التشغيل والضغط على زر 3 ونجمة وزر الاتصال ) لكن بدون فائدة !
الصراحة عقدني الجهاز وكرهته وكرهت النوكيا ..
انا اشتريت الجهاز بـ 1700 ريال سعودي .. بعدين شفت في كاتلوج مكتبة جرير ان سعر الجهاز كان قبل فترة بسيطة تقريبا 2249 ريال !
والان سعر الجهاز تقريبا 1500 ريال .. واضح الانخفاض السريع لسعر الجهاز في فترة بسيطة .. وفي جوالات ثانية على نفس السعر من فترة طويلة ..
وجوالات ارتفع سعرها !
انخفاض السعر يعني ان الجهاز ما يمشي لكثرة مشاكله والشكاوى عليه ..

ونصيحتي لا احد يشتريه والله نوكيا خربت مع الصناعة الصينية !
والرجاء نشر هذا الموضوع للفائدة .. وآسف على الاطالة

المشاكل باختصار :
1- عند الضغط على زر العودة - او تشغيل الاسبيكر .. الخ - يتم ضغط زر انهاء المكالمات لقربهما من بعض.
2- الجهاز يقوم تلقائيا بوضع المكالمة في حالة التعليق مع عدم المقدرة على انهاء المكالمة !
3- عند وصول أية رسالة يقوم الجوال باعادة التشغيل تلقائيا !
4- مرسل الاف ام لا يعمل بعض المرات .
5- لا تستطيع الضغط على الارقام للاتصال في حالة وضع شاشة الاستعداد الرأسي.
6- لا يمكن عمل فرمته عن طريق الضغط بالازرار الاربعة المعروفة.